• +7 705 552 22 02  

  • Қазақстан Республикасы, Астана қ, Сығанак көш. 43, 15 қабат.

Қазақстандық блокчейн-технологиялар қауымдастығы Paxaro Labs компаниясымен ынтымақтастық туралы меморандумға қол қойды

Жарияланған күні: 07.07.2022

Қазақстандық блокчейн-технологиялары қауымдастығының басқарма төрағасы Сапар Ахметов пен Paxaro Labs-тың тең құрылтайшысы Асхат Бекмағамбетов Орталық Азиядағы Web3 & Blockchain индустриясын дамыту бойынша ынтымақтастық туралы меморандумға қол қойды. Тараптар өзара ынтымақтастықтың бірқатар бағыттарын белгіледі, соның ішінде таратылған тізілім технологиясына негізделген өнімдер туралы халықты ақпараттандыру және елдің жоғары оқу орындарында Paxaro Labs білім беру бағдарламасын интеграциялау бойынша бірлескен жұмыстар кіреді.

Сапар Ахметов, Қауымдастықтың басшысы: «Paxaro Labs-пен меморандумға қол қою – елдің криптоиндустриясын дамыту бойынша бірлескен жұмысты күшейтудің қисынды қадамы. Азаматтардың білімі мен жастарды оқыту еліміздің адами капиталының дамуына және білікті мамандардың өсуіне ықпал етеді. Бұл саланы дамытудың әлеуеті мен қажеттілігін Мемлекет басшысы мен Үкіметтің ерекше көңіл бөлуі растайды».

Қол қойылған меморандум аясында жастардың қаржылық сауаттылығын арттыру мақсатында еліміздің жоғары оқу орындарымен өзара іс-қимыл жасау жоспарлануда. Халықаралық аналитикалық компаниялардың соңғы мәліметтері бойынша, Қазақстанда 324 мыңнан астам азамат криптовалютаға иелік етеді. «Астана» халықаралық қаржы орталығының базасында крипто биржаларының жұмыс істеуі бойынша пилоттық жобаның іске қосылуы азаматтарға цифрлық активтерді заңды түрде сатып алуға, сақтауға және сатуға мүмкіндік берді.

Асхат Бекмағамбетов, Paxaro Labs басшысы: «Бүкіл әлемде криптовалюталардың жаппай қабылдануы қоғамның жаңа саланы байсалды және дұрыс қабылдауы үшін сарапшылардың бірлескен күш-жігерін талап етеді. Осыған байланысты Меморандумға қол қою арқылы Қазақстандық блокчейн-технологиялар қауымдастығымен серіктестікті нығайту Қазақстандағы саланы дамыту бойынша күш-жігерді біріктіру үшін маңызды оқиға болып табылады».

Меморандум нәтижесінде Қазақстандағы криптоиндустрияны дамытуға ықпал ететін келісілген іс-қимылдар бойынша Жол картасы іске қосылады.